الخرطوم ,

آخر التعليقات

  • البرلمان يحقق في إصابة العشرات بـ«العمى» بمستشفي مكة

    سامي عباس علي 11.05.2017 08:18
    صاحب التعليق الاول و.ع.ع لو فعلا الكلام القلته دا حقيقي ماكان اختصرت اسمك وكان تركت تلفونك عشان الناس ...

    اقرأ المزيد...

     
  • التهامي لـ(آخرلحظة) :وضعنا اللمسات الاخيرة لحوافز المغتربين

    adram kings 10.05.2017 07:54
    يبدو ان الحكومة ليست لديها برنامج قومي واضح للإفادة والاستفادة من موارد المغتربين القابلة للنضوب.

    اقرأ المزيد...

اكثر التعليقات

صفحتنا على الفيسبوك

6303 زائر، ولايوجد أعضاء داخل الموقع

اتعلموا الحجامة في ضهر اليتامى!!

تقييم المستخدم: 0 / 5

تعطيل النجومتعطيل النجومتعطيل النجومتعطيل النجومتعطيل النجوم
 

 

راي:بت محمود

 

وأخيراً تشكلت الحكومة الجديدة وكانت مفاجأة بحق، فلا جديد يذكر فيها ولا قديم يعاد، المهم قسمت الكيكة، وفي الحقيقة هو ما فضل كيك زاتو شوية قرقوش اتقاسموه مع بعض، المؤتمر الوطني هو الحزب الأكبر طبعاً نتمنى عليه أن يرفع يد الوصاية والعجرفة عن مشاركيه في السلطة جربوهم عسى ولعل يكونوا أصحاب أفكار، لأن مشكلتنا ليست في تغيير الوجوه في حكومات المؤتمر الوطني، مشكلتنا في سوء الإدارة وسوء التخطيط وعدم وضع الشخص المناسب في المكان المناسب. ثمانية وعشرون عاماً من ضل حكومة لي حيطة مفاوضات وترضيات وهذا الذي يرضى يخش القصر وبعد شوية يحرد ويزعل في شنو ما بنعرف، طبعاً ما بورونا الشمارات الدقاق دي مع إنو قالوا في ديمقراطية!!.. كمان شايفة مبارك الفاضل بعد حرد رجع في مسماه، غايتو الله يدينا خيركم بس ماعلينا، أهم يجربوا الحجامة فى ضهر اليتامى، واليتامى هو الشعب السوداني طبعاً.
تشكلت الحكومة بوزراء بعضهم من الكيانات التي شاركتهم الحوار وطق الحنك وكمية من نواب للبرلمان بالتعيين، غايتو سمعت بي نائب يجي بانتخابات مزورة، لكن بالتعيين ده يطرشني، والسؤال البطرح نفسه مالكم دايرين تزيدوا الشعب شظفاً على العليه بمخصصاتكم البرلمانية، هم الجو بالانتخاب ماعرفنا ليهم شيء غير الصفقة، معظمكم كان ينادي برفع المعاناة ونصرة المهمشين وشنو ما بعرفو داك ما مشكلة، الكلام بقروش ما يتكلموا لكن جنس الصرف الفاضي ده هو البزيد المهمشين رهقاً على ضنك، وسبب صريح لتردي الخدمات وغلاء الأسعار وسوء المنقلب، لكن مالو انتو كمان جربوا الحجامة في ضهر اليتامى!! ودخلت البيوتات الدينية مساعدين والّا مستشارين ما عرفته، وطول عمرنا ما شفنا ليهم شيء اللهم إلا ركوب الخيل والشو وحب الظهور، وأصلاً البيوتات دي شايفة إنها أحق بحكم السودان مسجل باسمهم ولدوا ليصيروا حكاماً وهلمجراً، لكن برضو بتاخدوا في فرص عشان تتعلموا الحجامة في ضهر اليتامى البلد بلدكم وانتو أسيادها.
 الشعب السوداني ينتظر إنجازات ناس الحوار الوطني بدون ثرثرة نرجوكم أعملوا في صمت إنجازاتكم سوف تثرثر بدلاً عنكم وإذا فشلتم رجاءً التنحي بهدوء لا نريد سماع تصريحات استفزازية من شاكلة البيتزا والصابون والكبريت وملينا ليكم دواليبكم ملابس والما قادر يتعلم يلجأ لديوان الزكاة وايييييك الاستفزازات لا حصر لها ولا عد والله الهيصة والمنضمة الكتيرة دي ما بهمنا فيها غير قفة الملاح خليكم عارفين.

أضف تعليق


كود امني
تحديث